• المقادير :
• سكر للكراميل
• ٥ بيضات
•  فانيليا
• ٢ كوب لبن
• علبة زبادي
• نص كوب سكر ناعم .

مقادير الكيكة :

• ٣ بيضات
• فانيليا
• كوب سكر ناعم
• نص كوب لبن
• نص كوب زيت ذرة
• ١ ونص كوب دقيق
• كيس بيكنج بودر
• ٣ ملاعق كاكاو خام .

• طريقة التحضير :

* اول حاجة نعمل الكراميل نجيب طاسة صغيرة ونحط فيها السكر ومعلقتين مية ونقلبه على النار لغاية مايتكرمل ويبقا لونه ذهبي .. ونجيب الصينية اللى هنعمل فيها الكيكة .. نصب فيها الكراميل بعد رفعه من على النار على طول لانه بيمسك لو سبناه ..
وبعدين نحطها فى التلاجه تمسك نفسها ..

* نيجى للكريم نجيب طبق نكسر فيه البيض والفانيليا ونضربه بالمضرب وبعدين نضيف السكر وبعدين اللبن والزبادي ونضربه كويس .
وبعدين نضيف الخليط دة على الكراميل ونسيبه على جنب لغاية مانعمل الكيكة ..

* فى نفس الطبق اللى عملنا فيه الكريم نجيب البيض ونكسره ونضربه بالمضرب مع الفانيليا والسكر لمدة ٥ دقايق .. وبعدين نضيف اللبن والزيت ونضرب كويس .. وبعدين هنضيف الدقيق والبيكنج بودر ونضربه .. واخر حاجه هنضيف الكاكاو ونضربه كويس ولو احتاج سنة لبن بسيطة نضيف ..

* هنجيب الصينيه اللى فيها الكريم كراميل وهنضيف عليها مقدار الكيكة وطبعا مش هنقلبهم على بعض ، وهنلاحظ ان المقادير اتلخبطت على بعض بس مانقلقش هى هتنفصل كل طبقة لوحدها لما تدخل الفرن ..

* هنجيب صينيه حجمها اكبر من اللى عملنا فيها ونضيف فيها ماية مغليه ونحط الصينيه اللى فيها الخليط عليها وندخلها الفرن على درجة حرارة متوسطة اللى بنعمل فيها الكيكة العادية ..

* بعد ساعه الا ربع تقريبا هنختبر الكيكة بعود خشب او سكينة .. لو طلعت جافة يبقا استوت .. لو مش جافه ولزقت نسيبها فى الفرن كمان شوية لغاية ماتكمل سوا ..

* اول ماتستوى نطلعها وهنبدل الماية اللى فى الصينية اللى تحت بماية باردة ونسيبها لغاية ماتبرد وندخلها التلاجة ..

* لما نيجى نقدمها نحط شوية ماية دافيين عشان الكراميل يفك من تحت ونقلبها فى طبق كبير وتقطع وتقدم فى اطباق ..

لو عاوزين الكيكة طرية قبل مانقلبها نجيب نص كوب لبن دافى وعليه معلقه صغيرة سكر ومعلقة كاكاو ونقلبها ونخرم الكيكة بالسكينة ونشربها ونسيبها ٥ دقايق تتشرب قبل مانقلبها ..

#معلـــــومة :
سبب تسميتها قدرة قادر لانها بتتكون من ثلاث طبقات الكراميل والكريم والكيكة .. ولما بنعملها بتختلط الثلاث مكونات دول ببعض .. بس لما بتستوى بتنفصل كل طبقة عن التانية بقدرة قادر وبتكون مرتبة  ،،
جربوها هتعجبكم